حجنجلي...بجنجلي
وجيه عباس
حجنجلي بجنجلي حاير عراقك ياعلي
***
حاير عراقك والنبي صارت الوادم لبلبي
العالِمْ يساووه إبْغَبي والشيخ صاير سربلي
حجنجلي بجنجلي
***
حاير مثل زاير جبر من بطن أمّه للكَبرْ
ماشبع روبة ولا تَمُرْ وتاليهه ولية ينولي
حجنجلي...بجنجلي
****
حاير عراقك بالذبح كل ساعة يتذكّر جرح
مثل اليرشّه بالملح صخله ويسمّيهه طلي
حجنجلي بجنجلي
****
واكَف ومايضرب سره ومايدري بالصار وجره
الكَدام صاير ليوره والوره صاير أوّلي
حجنجلي بجنجلي
****
صاير مثل كاكه حمه لانفع روحه ولاحمه
بالفرن نام وماحمه من صعد فوكَـ الجبلِ
حجنجلي بجنجلي
****
حاير عراقك بالوَضِعْ والّي لِزَكـْ ماينشلع
كل واحد يدوّر رَبُعْ بالمفرد يبيعك صلي!
حجنجلي بجنجلي
****
حاير يشد بياكِتِرْ كل واحد امزيّن صِفِرْ
الكَرعة تهلس بالشعرْ والاكَرع يدوّر جلي!
حجنجلي بجنجلي
***
زدنه بصبرنه ومانكَصْ والدمع بعيوني خَلَصْ
خيّر طلع حسنة ملص وفنّك تعارض...تبتلي
حجنجلي بجنجلي
****
ليست هناك تعليقات:
إرسال تعليق