ارد اكولن الحمد لله على السلامة ..صارلنة تسع سنوات بدون صدام حسين وبدون حكم البعث ..

صح الوضع بالعراق اليوم مو مثل ما كلنا نتمنى ..

العملية السياسية متعثرة .. البلد بحاجة الى اعمار حقيقي .. لكن بصراحة .. الناس صحت ولا بد من ان الامور تتحسن مستقبلا ..

فرغم كل اللي صار بعده العراق واحد وما تطشر عشرين وصلة .. ولا تكولولي مامش شغل .. الشغل موجود والخير موجود واللي ميريد يبوك .. الله فاتحلة ميت الف درب ودرب للكسب الحلال

ردت اخلي صور عربة صدام المصنوعة من ذهب العراقيات . تذكرون ذيج الايام الكشرة بنص حرب ايران من جبرونا انكت ذهبنا ؟؟

ليش احنا طلبنا الحرب ؟ لو يمكن احنا مثل الصومال بلد ما بي اي وارد غير ماي البحر والسمح المعفن؟

مو عيب قائد ضرورة يجبر الناس على التبرع بالذهب؟

واخرها .. يجمعون الذهبات ويصيغولة عربانة .. ذهب ..

يحجيلي واحد من الامركان اللي شافوا العربانة بالمخازن مال الشفية قبل سنوات .. نقلوها طبعا للحكومة العراقية في وقتها ..يكول عبالنا عربانة مصنوعة بتايوان الى ان جينا ندفعها .. ثكيلة مدري جم طن .. بعدين واحد من المسؤولين العراقيين شرحلنا تاريخ عربانة حسين كامل .. سواها بمناسبة 28 نيسان (عيد ميلاد الشفية .. على اساس الشفية ينعرفلة يوم ميلاد ..) وبناها الفلتة اللي انكتل مثل الجلاب –حشاكم- من ذهب العراقيين ..

ما اريد احطلكم صور مقابر جماعية .. ولا صور الرضوانية .. ولا صور تماثيل الشفية .. يمكن بعدين احطلكم صور بناية الامن العامة مال البلديات الي انسجنت بيها ويه ¾ الشعب العراقي ( اي .. السجن ذاك جان محطة لازم العراقي يشوفها بحياته او يموت بيها) ولا اريد احطلكم صور الزيتوني ولا صور عدي وقصي والاولمبية والامن الخاص والمخابرات وفاضل البراك وشلون لبسوا التهمة وكتلو واستشهاد السيد الصدر الاول والثاني واستشهاد بنت الهدى وشهدائنا بايران .. ولا اريد احطلكم صور كيكات عيد ميلاد الشفية ولا صور البسكت المعفن الجانو يسوه بالثورة ويتسممون بي الجهال لان ماكو لا طحين مال اوادم ولا شكر ولا عمة بعين البعثيين ..

لا .. راح اخليلكم صور العربانة ذيج .. تذكار ووصمة عار بكصة صدام وربعة ..

وما اكولن الا الحمد لله رب العالمين اللي شفنا بي العراق بدون صدام ..

اعذروني كتبت بلهجتنا اليوم .. لان اكو مواضيع .. ما ترهم نكتب عنها الا بالعراقي ..

ميادة

 صدام لو سندريلا .. والله ما فهمنا ..

بالروح بالدم نفديك ياهو الجان ...

اتمنى لو خالين صورة المرية اللي لكوها بالمقبرة الجماعية اللي يم الحضر .. الرصاصة موجودة بصدرها لكن الطفل المعلك برقبتها وكاظ لعبة بيدة مات خنك بالقبر .. اندفن حي .. عساها ابخت كلمن يترحم على ذاك الوكت ..

علم العراق بردة وستر والنخلة وكمرة وربيعة ودم الناس السد عين الشمس 

حطنا على سجة الموت والفساد وكال هذا عراقكم يا عراقيين .. انتو مشاريع شهادة .. لعنة الله على يزيد وصدام 

الحمد لله الذي لا يحمد على مكروه سواه ..