ليش عود؟
اسئلة تجي ابالي نيابة عن كل هالبشر بديرتنة ...
عود صدك يكون بقمة بغداد التمر كان مغلف بورق ذهب؟
وعود صدك ابو الكويت جاب وياه حتى الكرسي الكعد عليه بالمؤتمر والكلاصات والماي؟
معقولة؟
وعود صحيح فندق الرشيد اللي كان ممكن اعادة تاهيله بعشر ملايين دولار اعادوا تاهيلة ب 850 مليون دولار ؟؟؟
ليش عود كل هالحموضة؟
مكافي السلاح الاكسباير اللي يدخلونه بسبة الجديد وياخذون كومشنات للستار؟
مكافي الشوارع اللي تكفع كل 3 تشهر وينعاد تبليطها من قبل مقاول يعود لهذا او ذاك من المسؤولين؟
مكافي 117 مليار دولار ميزانية راح تنزل بالجيوب ووراها تروح حكومتنا الوردة تتداين من البنك الدولي؟
عود ليش .. لازم انكدي ؟ متعودين على الكدية ما يكدرون؟
دسنا على طرف جني لو شسوينا بهالحياة وهذا حظنا ؟؟؟
غريبة مو ..
جنا بوكت الشفية صدام عايشين ب 5بالمية من ايرادات النفط .. شوارع ومدارس وخطط خمسية وسجون امن ومخابرات وكله .. شتفكرون موجود .. راح صدام وانشلع الى حيث وبئس المصير .. ما مفترض انشد الهمة ونصير اوادم ونبني العراق ونبجي هاليبجون على ايام صدام ؟؟؟ الا نفرحهم بخيبتنة؟
ليش؟ شبينة يحظي؟
اليوم ميزانيتنا جبيرة والعراق ما عدى المنطقة الكردية خرابة ..
ليش عود؟؟
الخبر يكلك ما يلي :
قالت عضو لجنة النزاهة النيابية عالية نصيف إن المبالغ التي خصصت لإعادة تأهيل بعض الفنادق في بغداد كانت كافية لبناء فنادق جديدة.وأضافت أن تأهيل فندق الرشيد لا يتطلب أكثر 10 ملايين دولار بينما أنفقت الحكومة على تأهيله ثمانية وخمسين مليون دولار، وكذلك الأمر مع الفنادق الأخرى، حسب قولها.وأشارت نصيف إلى أن اللجنة تعكف على مراجعة تقارير من ديوان الرقابة المالية حول الموضوع، وستحيل الملف إلى هيئة النزاهة إذا ثبت وجود حالات فساد.
اها .. قريتوا اخر جملة ؟؟ يكلك... اذا ثبت فساد
كل هذا وما مش فساد ثابت ..
واللهم طولج يروح
والحلوة .. يكلك اكو تجمع جديد بالنجف الاشرف امسمينه "وين راحت فلوس الشعب"
بس الما معقول هو التالي:
قال عضو التجمع الناشط هادي السلامي إن مقدار الموازنة لعام 2012 "هو أكثر من 102 تريليون دينار، ونحتاج إلى مراقبة الموازنة الحالية والبحث في معرفة مصير الفائض المالي لباقي السنوات الماضية ومقدار المنح الدولية والمساعدات التي لا تظهر في الموازنة".
عود ليش يتعب نفسه بهالتصريحات .. ومنهو الراح يسمحله ايراقب او ايفتش؟ وخليه يراقب مناه لسبع اسنين .. بالنهاية يمش ايده بالحايط ..
لازم اتصير فد صحوة .. ما معقولة العراق يستمر هالشكل ..
وما معقولة نبقى نكول : ليش عود ..
ليست هناك تعليقات:
إرسال تعليق